که‌س وه‌ک تۆ به‌ دوامدا نه‌گه‌ڕا ...

که‌س وه‌ک تۆ ونی نه‌کردم!

 فۆتۆ. کامەران شەوقی

که‌س له‌ تۆ نه‌چوو

تۆ له‌ که‌س نه‌چوویت

که‌س وه‌ک تۆ سه‌رنجی نه‌دام

که‌س وه‌ک تۆ نه‌یبینیم

که‌س وه‌ک تۆ شێوه‌ی نه‌کردم

که‌س وه‌ک تۆ نه‌یبردمه‌وه‌‌ ناو ئێواره‌ی ئاوێنه‌که‌ی

که‌س وه‌ک تۆ خۆمی پیشان نه‌دام و

که‌س وه‌ک تۆ

ونی نه‌کرد‌م!

تۆ له‌ که‌س نه‌چوویت

که‌س له‌ تۆ نه‌چوو

که‌س وه‌ک تۆ ... ته‌نیایی پڕ به‌ به‌ری خۆم

بۆ نه‌دووریم

که‌س وه‌ک تۆ به‌ هوروژم نه‌هات

که‌س وه‌ک تۆ نمه‌ نمه‌ نه‌ڕۆیشت

که‌س وه‌ک تۆ سه‌فه‌ری لێوه‌ نه‌کردم

که‌س وه‌ک تۆ

له‌ خۆیدا هه‌ڵینه‌گرتم!

که‌س وه‌ک تۆ نه‌یبردمه‌ به‌ر باران

که‌س وه‌ک تۆ به‌ باغه‌کاندا نه‌یگه‌ڕاندم

که‌س وه‌ک تۆ له‌سه‌ر قه‌دی دره‌خته‌کان هه‌ڵینه‌کۆڵیم

که‌س وه‌ک تۆ به‌ ڕه‌چه‌‌ڵه‌کی مێرووه‌کاندا

نه‌یبردمه‌وه‌ سه‌ر نه‌سه‌بی خۆم و

که‌س وه‌ک تۆ به‌ ناوی خۆمه‌وه‌ بانگی نه‌کردم

که‌س وه‌ک تۆ له‌ سه‌فه‌ردا نه‌یناسیمه‌وه‌

که‌س وه‌ک تۆ له‌ جێگه‌ هه‌میشه‌ چۆڵه‌که‌دا

له‌ شه‌مه‌نده‌فه‌ره‌کاندا له‌ ته‌نیشتمه‌وه‌ دانه‌نیشت

که‌س وه‌ک تۆ به‌پێی په‌تی به‌ ڕێگاکاندا

له‌ گه‌ڵمدا نه‌هات

که‌س وه‌ک تۆ  

له‌به‌رخۆیه‌وه‌ نه‌یخوێندمه‌وه

که‌س وه‌ک تۆ به‌ چاو ته‌ماشای نه‌کردم

که‌س وه‌ک تۆ به‌ جێگه‌پێی خوێناویی زاهیداندا

تا سه‌ر لێواری خه‌ره‌ند نه‌یبردم!

که‌س له‌ تۆ نه‌چوو

تۆ له‌ که‌س نه‌چوویت

که‌س وه‌ک تۆ نه‌یبردمه‌وه‌ به‌ر هه‌تاو

که‌س وه‌ک تۆ نه‌یهێنامه‌وه‌ کۆڵان

که‌س وه‌ک تۆ نه‌یگه‌ڕاندمه‌وه‌ ناو پاییز

که‌س وه‌ک تۆ باوه‌شی بۆ نه‌گرتمه‌وه‌

که‌س وه‌ک تۆ چۆڵی نه‌کردم

که‌س وه‌ک تۆ .... به‌رده‌وام‌

ئازادی نه‌‌ده‌کردم و

که‌س وه‌ک تۆ هه‌میشه‌

گه‌مارۆی نه‌‌ده‌دام!

تۆ له‌ که‌س نه‌چوویت

که‌س له‌ تۆ نه‌چوو

که‌س وه‌ک تۆ له‌ شه‌ڕه‌کاندا له‌سه‌ری نه‌کردمه‌وه‌

که‌س وه‌ک تۆ

له‌ ئاشتییه‌کاندا له‌ گه‌ڵمدا به‌ شه‌ڕ نه‌هات

که‌س وه‌ک تۆ له‌ سه‌رهه‌ڵگرتنه‌کاندا

له‌گه‌ڵمدا دانه‌نیشت

که‌س وه‌ک تۆ له‌ پێکه‌وه‌بوونه‌‌‌کاندا

لێم هه‌ڵنه‌هات

که‌س له‌ تۆ نه‌چوو

تۆ له‌ که‌س نه‌‌چوویت

که‌س وه‌ک تۆ قه‌ره‌باڵخیمی نه‌هه‌ژاند

که‌س وه‌ک تۆ ته‌نیاییمی دانه‌گیرساند

که‌س وه‌ک تۆ تێکوپێکی نه‌دامه‌وه‌‌‌

که‌س وه‌ک تۆ ‌دروستی نه‌کردمه‌وه‌

که‌س وه‌ک تۆ هه‌ڵینه‌وه‌راندم

که‌س وه‌ک تۆ له‌ ئینجانه‌که‌ی حه‌وشه‌دا

نه‌یڕواندم!

تۆ له‌ که‌س نه‌چوویت

که‌س له‌ تۆ نه‌چوو

که‌س وه‌ک تۆ دڵڕه‌قانه‌

خۆشی نه‌ویستم

که‌س وه‌ک تۆ میهره‌بانانه‌

جێی نه‌هێشتم!

که‌س له‌ تۆ نه‌چوو

تۆ له‌ که‌س نه‌چوویت

که‌س وه‌ک تۆ ... له‌ ئه‌زه‌له‌وه‌ به‌ دوامدا نه‌گه‌ڕا

که‌س وه‌ک تۆ .... تا ئه‌به‌د‌

بزری نه‌کردم!

                                            پاییزی 2009